ADN y populismu

Milio Rodríguez Cueto
La Nueva España, 25/11/2017
https://miliorodriguezcueto.wordpress.com/2017/11/25/adn-y-populismu/

Iberdrola anunció que pieslla la térmica de Lada y Pedro Luis Fernández, el presidente de la FADE, dixo qu’igual-y faltó a la eléctrica sensibilidá pa col entornu; al otru día, l’alcaldesa de Xixón protestó contra los repetíos «escapes» contaminantes d’Arcelor, ensin pedir el cierre de la empresa, y Pedro Luis Fernández acusóla de populista y visceral. Ehí tenemos un exemplu meridianu de lo que s’entiende por doble vara de medir, llarga y arrogante pa colos del propiu gremiu.

Con Iberdrola, l’argumentación «sensible» del presidente de la patronal asturiana tíñese d’una especie de lirismu de polígonu industrial: «El carbón no es sushi para nosotros: es algo que está en nuestro ADN». La contaminación siderúrxica, en cambiu, deben ser ablanes turriaes que rucamos con gustu los ciudadanos dándo-yos vueltes na boca.

Yo crecí cola lámpara del güelu empostiador, muertu de silicosis a los 64 años, colgada memorialísticamente en casa y, qué quier que-y diga, por munchos años que gasté mirándola con placer, por munches veces que-y pasé un trapu con vinagre y sal pa saca-y brillu (y nunca escucó xeniu carboneru con tres deseos envueltos nuna toalla d’HUNOSA), lo que llevo nel ADN ye timina, guanina, citosina y adenina, como usté y como tol mundu. Y, si m’obliguen a poneme metafóricu, amiesto castañeos, pumaraes, praos y el ríu Raigusu, que ya taben equí muncho enantes del primer castillete y van seguir cuando se reconvierta l’últimu en casa rural pa finales de selmana. Pero carbón… Tamién pue ser que’l presidente saliente (esta vez valnos la rima interna por tratase d’un aficionáu a la poesía) de la FADE tenga un vínculu más íntimu que yo coles toalles d’HUNOSA: igual a él sí se-y presentó’l xeniu cargáu de regalos.

L’axetivu «populista» ya nun val nada. Abúsase d’él. Cualquier grupu privilexáu que siente lo que nun-y presta dispáralu en contrataque fulminante. La sobresplotación depreció’l términu, que ya cotiza en niveles ínfimos, bolivarianos en xusticia. A esti penosu estropiciu lésicu contribuye Pedro Luis Fernández al estampá-ylu na frente a l’alcaldesa playa de manera tan llixera, tan caprichosa. Igual él mesmu ye víctima inconsciente de la devaluación y ya nun reconoz el significáu correctu de la palabra. Pa facer memoria, si casualmente pasa usté la vista per estes ringleres, señor Fernández, compare la crítica que la rexidora-y fexo a Arcelor con esti exemplu que-y propongo:

«Al presidente de la FADE da-y igual la contaminación que pueda producir Arcelor. Vese que nun vive nos barrios obreros de la zona oeste de Xixón, amarráu a un pisu con hipoteca que naide-y va querer comprar nin a metá de preciu. Vese que, en so casa, nun quiten la ropa del tendederu más puerco de lo que lo cuelguen, y otra vez pa la llavadora. Vese que nun barre, cada mañana, hollín de los alfeizares de les ventanes. Vese que nun tien fíos pequeños que dexen los pañuelos negros cuando-yos suena la nariz…»

¿Dase usté cuenta? Esto sí ye populismu.